Documents rares ou
inédits de l'histoire des Vosges
Tome. 8
1884 Mai 1296
Confirmation par Henri, sire de Blamont, du
don à Jean de Bourgogne, son gendre, de l'acquet fait par
échange sur Ferry de Charmes, à Fontenoy et Xertigny.
Origine Charte sur parchemin, aux archives de M.
le Prince de Bauffremont-Courtenay, duc d'Atrisco.
Nos Henriz sires de Blanmont et Cunegons sa fame, facons savoir
à toz, que cum nostre amez ganre Jehans de Bourgongne, fiz à
noble baron Hugon conte de Bourgongne qui fu, ait aquesté et
teigne per eschange, de Ferri de Charmes, fil Odon conte de
Toul, qui fu, tot quanque li diz Ferriz avoit, pooit et devoit
avoir à Fontenoy le Chestel et es appartenances, en fiez et en
vardes et en totes autres choses, on ban d'Eschateigneys et es
apartenances, les quex choses desur dites li diz Ferriz tenoit
en fie et en homaige de moi Henri signour de Blancmont desur
dit, nos Henriz sires de Blancmont et Cunegons sa fame devant
dite, volons, loons et outroions, au dit Jehan et à ses hoirs,
les choses desur dites aquestées par eschange dou dit Ferri. Et
volons et outroions que li diz Jehanz et sui hoir teignent les
choses desur dites aquestées en nostre d'eschange de nostre
chier signour Ferri duc de Loheroinne et marchis, ensi en la
forme et en la meniere cum li diz Ferriz de Charmes les tenoit
de moi, Henri desur dit, en fye et en homaige. Et cest don et
cest outrois avons nos fait au dit Jehan et à ses hoirs, en
compensacion des benefices et des services qu'il nos a fait.
Ancor est à savoir que se nostre fille Marguerite, fame audit
Jehan, defailloit sanz hoirs dou dit Jehan, que à Deus ne doint,
li diz Jehanz et sui hoir tanroent et devroent tenir en fye et
en homaige, de nos et de nos hoirs, les choses desur dites,
eschangies einsi cum il est contenu es laitres faites de ce,
saelées dou seel mon dit signour le Duc.
Et renonçois en cest fait, je la dite Cunegond, par ma foy donée
corporelment, à totes exceptions et privileiges de doaire et de
don por noces, et generalement nos, li dit Henriz, Cunegons sa
fame, renonçons en cest fait à totes barres, allegations et
dépenses qui contre ces presentes laitres porroent estre
opposées et à nos et à nos hoirs porroent aidier ou valoir en
cest fait et audit Jehan ou à ses hoirs nuire ou grever. En
tesmoignaige de laquel chose, nos Henriz, sires de Blanmont, et
Cunegons sa fame, desur dit, avons mis nos seas en ces presentes
laitres faites l'an Nostre Signor mil douz cenz quatre vinz et
saze on mois de may.
(Les deux sceaux appendus sur double queue de
parchemin, n'existent plus). |
