|
Histoire
généalogique de la maison de Vergy
André Du Chesne
Ed. Paris : Cramoisy 1625
[1391 - Jean de Vergy]
Et en ce temps il accorda auec les Comtes de Deuxponts,de Salmes,
de Sauerne,& autres Seigneurs d'Alemagne, nn Traité d'alliance &
de confederation mutuelle pour la guerre qu'ils vouloient faire
contre Henry Seigneur de Blammont & de Contrelin, lequel merite
bien d'estre icy rapporté tout entier.
Novs IEHAN DE VERGEY seigneur de Fonuans es de Champlite, Hauman
& Simond Vveckere Contes de Deuspons, Signeurs de Bitsches,
lehan Comte de Salmes, Henri fire de Lichtemberg, Henri Comte de
Saluerne, firede Rabaupierre & de Honag, & Iehan sire de
Lichtemberg, faisons sauoir à touz, Que comme ia pieça certennes
aliances aient esté faites, passées & adcordées entre nous tous
lez deuant nommez, touchant le fait de la guerre de Meßire Henry
Signeur de Blammont & Contrelin, contenens que s'il auenoit en
temps auenir tant & si long comme nous & lidis sire de Blammont
viurons guerre ou debat encommençoit entre nous tous contre lui
ou aucun de noz ou plusieurs de nous,pour les propres fais &
causes de nous tous ensemble, ou de l'vng de nous, liquelx on
lesquelx cilz ou ceulz entre nous lez dis aliez desiroit ou
desirient, requeroit ou requerient aide à nous les autres ses
aliez, ou aucun de nous par bouche ou par lettre,que nous tous
debuons estre aidans l'un à l'autre sans aucun delay. Laquele
chose cilz ou ceulx entre nous qui en aueret ou en auerent
beseng, le debuons faire sauoir aus autres aliez chescun en
chief lu. C'eft assauoir à nous IEHAN DE VERGEY sire de Fonuans
à Fonuans, Hauman & Simond Vveckere á Bitsches, lehan Comte de
Saulmes à Baudonuiller, Henri sire de Lichtemberg à Bousvvilre,
Henri Comte de Saluerne a Saluerne, & lean sire de Lichtemberg à
Ingelvvilre. Et debuons encommencier la guerre contre ledit de
Blammont tantost dedens les quinze jours apres la requeste ehue
sens malengin. Et il soit ainsi que en nostredite lettre de
aliances ne soit mie desclariez quel aide l'un de nous doit
faire à l'autre, ne la quantité de gens d'armes que l'ung de
nous doit faire à l'autre. Laquele ayde & quantité de gens
d'armes que un chescun de nous doit faire à l'autre est & sera
telle. Premier, que un chescun de nous doit ouvrir toutes ses
forteresses pour recepter les autres aliez qui en auerent beseng
contre ledit de Blanmont. Et doit-on en icelles forteresses
donner viures pour argent & pour fuerre raisonnable à ceulx qui
y seront receptez. Et que vng chescun de nous tous lez d'entre
nommez serons tenus de faire aide à celui ou ceulx de nous dis
aliez qui auerient guerre de dix compaignons d'armes, & d'iceux
enuoier en la ville de Badonuiller, ou autre part, où celuy qui
pour le temps aueroit guerre, aueroit milleur beseng ausi pres
de la terre & fourteresses dudit de Blanmont, pour faire guerre
à icellui sire de Blanmont, lesquelx ung chescun de nous
enuoyerait tantost dedens la quinzainne apres la requeste, comme
devant est escript. Et tenrons durant ladite guerre à nous
despens esdis lieux, sans ceu que celui ou ceulx qui auerient la
guerre soient tenuz d'aucune chouse restourer, recroire, ou
rendre aucun damaige ou perde qu'ilz faicent, Auci est assauoir
que s'il auenoit que nous li deuant dis de Vergey ehußiens
guerre contre lidit de Blanmont, nous tous les autres deuant
nommer serons tenus d'aider audit de Vergey, c'est assauoir
chescun de nous doit enuoyer pour ledit de Vergey deix
compaignons d'armes és lieus d'entre nommez. Et d'iceulx
compaignons doit-on enuoyer dix compaignons d'armes pour ledit
de Vergey en ses forteresses en Bourgoingne, s'il le requiert.
Et les autres compaignons doient demourer la guerre durant pour
lui es dis lieus de Baudonuiller ou à Pierrepercie,ou autre part
auci pres de la terre & forteresses dudit de Blanmont. Lesquelx
nous les aliez deuant nommez li enuoierons tantost dedans la
quinsainne apres la requeste, & tenrons la guerre durant à nous
despens, sens restour de perde, comme deuant est escript sans
malengin. Et s'il auenoit que lidiz de Blanmont à force d'armes
veinst contre nous lesdiz aliez, ou l'ung de nous, ou nous ou
aucun de nous alleßiens contre ledit de Blanmont à force d'armes
: nous tous seriens tenus d'aidier à celui, ou ceux qui verroit
aller contre ledit de Blanmont, ou ceulx ou celui contre qui
ledit de Blanmont veinst, chescun de trente hommes d'armes. Et
le gaing & profit que icelle gens d'armes feront ladite guerre
durant en prise de prisons, sera à celui ou ceulx de part quy
ilz seront en voiez, cheualx, harnoix, & autres choses qui
apartiennent en betin, sera aus compaignons, qui l'aueront
gaingnés, se donc n'estoit qu'ons pourparlest ung commun betin,
& s'il fuit ainsi adcordez, dont sera le betin aus communs
compaignons ainsi comme il sera adcordez. Et s'il auenoit que
aucuns de nous dis compaignons, ou de l'ung de nous fussent
prix, il est assauoir que nous tous ensemble, ne aucun de nous
ne polriens penretrievves audit de Blanmont, se les prisons n'ehussent
respeit si longuement comme les trievves dureroient, ne penre
paix se lez dis prisons ne fussent quittes. Auci est assauoir
que sel ung de nous, ou deux, ou plusieurs volxißiens faire
guerre audit de Blanmont, & que chescun de ceulx qui volxist
faire guerre volxist requerre nous les autres aliez d'aide,
comme deuant es escript, nous les diz autres aliez ne seriens
mie tenus d'aidier pluz fors que vng chescun de nous de deix
hommes d'armes pour celui ou ceulx qui auerient guerre tous
ensemble, & l'enforcement de gens d'armes, & le recept, ainsi
comme à cela appartenroit, comme deuant est escript. Toutes les
chouses, points & articles deuant escripts, & chescun par lui,
nous les deuant nommez.tous ensemble, & chescun de nous auons
iurez, promis, & creacez, & par ces lettres promettons, iurons,
& creançons par nostre foy & serement & subz nous honours de
tenir en bonne foy fermes & estables senz malengin. En tesmoing
de toutes les choses deuant escriptes auons nous tous les deuant
nommez aliez mis nous saiels pendans à ces presentes lettres. Et
est assauoir que s'il estoit chose qu'il falloit en ces lettres
ung des saiels de ung de nous les deuant nommez ou plusieurs,
pour ceu ne doient mie mains valloir ces lettres de tous les
points & artikels qui y sont comprix pour tous les autres qui
aueront leur saiel en ces lettres. Lesquelx furent faites &
escrites le jour de la Saint George l'an mille trois cens
quatre-vingt & onze.
|
