|
Premier volume des antiquitez de la Gaule Belgique
Richard de Wassebourg
1549
S'ensvit la vie de Thomas de Blammont soixante cinqieme Euesque de Verdun.
THOMAS de Blammont fut esleu euesque de Verdun l'an mil trois cens ij. Et estoit pour lors princier de ladicte eglise, comme on peult veoir par les anciens chartulaires de l'eglise, soubz le tiltre des extravagans, chapitre clviii commencant: Nos Thomas primaterius Virdunensis notum facimus, etc. Et si estoit filz du comte de Blammont, qui est vne comté située aux extremitez de la duché de Lorraine, vers les Allemagnes, & extraict d'ancienne noblesse des comtes de Saulmes, & de par sa mere des comtes de Bar. Car nous trouvons que Frederic filz puisné de Henry comte de Salm, eut pour son partage ladicte comté de Blammont, environ l'an mil deux cens trenteneuf. Et regna quarante ans, mourut l'an mil deux cens septante neuf. Et entre autres enfans laissa deux filz:dont l'aisné Henry premier du nom, succeda a ladicte comté de Blammont, en ladicte année mil deux cens
lxxvii. Et regna trente un an, mourut l'an mil trois cens dix. L'autre filz dudict Frederic fut cestuy Thomas, qui suyuit
l'estat de l'eglise, & fut euesque de nostre dicte cité de Verdun.
Et puis que l'occasion se donne icy parler des comtes de Blammont (laquelle possible ne se donneroit point cy apres)
i'escriray icy vn mot de la posterité desdidtz de Blammont. A scauoir que ledict Henry premier, frere de nostre euesque, engendra deux filz, l'vn nommé Henry deuxieme du nom, & l'autre Thiebauld, qui regnerent ensemble, & teindrent ladicte comté bien
l'espace de lxvii. ans: Car le dernier mourut l'an mil trois cens septantesept: auquel succeda Henry troisieme du nom, filz de Henry deuxieme, lequel commença à regner mil trois cens septantesept: & teint ladicte comté xliii ans: car il mourut l'an mil quatre cens vingt. Et laissa vn filz nomme Henry quatrieme, qui succeda à sondict pere, & espousa ma dame Elizabeth, fille de Ferry de Lorraine, comte de Vvaudemont, en Iaquelle il engendra plusieurs enfans. Entre lesquelz en y eut vn nommé Oulry, qui fut euesque de Toul:& finalement succeda a ladicte comté de Blammont apres le trespas de ses freres. Et apres sa mort les ducz de Lorraine & de Bar, succederent à ladicte comté, comme nous dirons cy apres selon l'ordre du temps.
|
